گرین لینڈ
گرین لینڈ دنیا دا سب توں وڈا جزیرہ اے، ایتھے تقریباً چھونجاہ ہزار لوک آباد نیں، اگر چہ ایہ سلطنت ڈنمارک دا حصہ اے لیکن نظام حکومت گرین لینڈ دا اپنا اے۔

گرین لینڈ دا زیادہ تر حصہ دائرہ قطب شمالی دے شمال وچ واقع اے، اس جزیرے دا کل رقبہ 21٫66٫086 مربع کلو میٹر اے، (جیس وچ چھوٹے جزیرے وی شامل نیں ) اس دے کل رقبے چوں 17٫55٫637مربع کلو میٹر حصہ (کل رقبے کا تقریبا 81 فیصد ) برف نال مستقل طور تے ٹکیا ریندا اے، ایتھے موجود برف دا مجموعی حجم تقریباً 28٫50٫000 مکعب کلو میٹر اے، اس ملک دی سب تو اچی چوٹی گنبیورن فیالڈ اے، جیس دی بلندی 3700 میٹر اے۔
گرین لینڈ دے شمال و چ بحر منجمد شمالی، مشرق وچ بحر گرین لینڈ، جنوب مشرق وچ شمالی بحر اوقیانوس، جنوب مغرب وچ آبنائے ڈیوس، مغرب وچ بیفن، اور شمال مغرب وچ نیریز آبنائے اور لنکن سمندر واقع اے۔
سب توں نیڑے دے ملکاں وچوں اک تے کینیڈا اے، ایدے نال گرین لینڈ دی مغرب اور جنوب مغرب دی بحری سرحد لگدی اے اور ہانس جزیرے تے زمینی سرحد اے، دوسرا قریبی ملک آئس لینڈ اے جہڑا جنوب مشرق وچ واقع اے۔
اک تین کلو میٹر دی موٹی برف دی چادر نے گرین لینڈ نوں ٹکیا اے، اس چادر دا وزن انا زیادہ اے کہ اس دی وجہ توں گرین لینڈ دی زمین دب کے سطح سمندر توں تھلے ہو گئی اے۔

گرین لینڈ دی آب و ہوا ٹنڈرا ( قطبی آ ب وہوا) والی اے، ملک دا ندرو نی حصہ ہر وقت برف نال ٹکیا ریندا اے، اوتھے درجہ حرارت 0 سینٹی گریڈ یا اس توں وی کٹ ای ریندا اے۔
اگر اسین دارالحکومت نک دا ذکر کریے تے ایتھے دیاں گرمیاں عام طور تے ٹھنڈیاں اور مختصر ہوندیاں نیں، جد کہ سردیاں معتدل ہوندیاں نیں، گرمیاں وچ وی درجہ حرارت انا کٹ ہوندا اے کہ ایتھے ہریالی نئیں ہوندی۔
گرین لینڈ دے برف توں پاک علاقیاں وچ 57,000 دے نیڑے لوک آباد نیں۔
آبادی دے لحاظ نال مقامی انیوئٹ 89.5 فیصد، ڈینش 7.5 فیصد تے باقی چھوٹیاں اقلیتاں نیں۔
گرین لینڈ دے اصلی لوک انیوئٹ ای نیں، ایہ لوک صرف ایتھے ای نئیں بلکہ پرانے زمانے توں الاسکا، کینیڈا، گرین لینڈ تے روس دے قطبی علاقیاں وچ وی وسدے آۓ نیں۔
انیوئٹ اصل و چ ٹولی لوکاں دی اولاد نیں، ٹولی او لوک نیں جو روس چوں براستہ پل بیرنگ ہجرت کر کے شمالی امریکہ اور اودھے اطراف دے ملکاں وچ آئے، ایتھے دے شدید ٹھنڈے موسم وچ زندگی گزارن دی عادت پیدا کیتی، ایہ لوک اسکیمو نیں پر اوہ اپنے آپ نوں اسکیمو آکھنا پسند نئیں کردے۔ انیوئٹ گرین لینڈ دی آبادی دا تقریبا 90 فیصد نیں، باقی ڈینش، نورڈک تے دوسریاں قوماں نیں۔

ٹولی لوکاں نے تقریباً 2700 توں 4900 سال دے درمیان آبنائے بیرنگ پار کیتی سی۔ ایہ جاننا دلچسپ ہووےگا کہ ساڈی موہنجودڑو دی تہذیب وی کوئی 4500 توں 5000 سال پرانی اے۔
گرین لینڈ دے ناں دی وجہ تسمیہ وی واوا دلچسپ اے۔ ایرک ناں دا ناروے دا اک بندہ آئس لینڈ توں جلاوطن کر دتا گیا۔ اوہ اپنے جہازاں تے سوار ہو کے اک برفانی علاقے وچ گیا تے اوتھے پناہ لئی۔ اس نے لوکاں نو‏‏ں اوتھے آباد ہون دی ترغیب لئی اس جگہ دا ناں گرون لینڈ رکھیا، جس دا مطلب ڈینش بولی وچ سبز زمین ا‏‏ے۔
گرین لینڈ دی بنیادی معاشی سرگرمی مچھی پھڑنا اے۔ ایدے توں علاوہ اس نو‏ں ڈنمارک تو‏ں کافی مالی امداد وی ملدی اے جو اس د‏ی کل آمدنی دا تقریباً اک تہائی حصہ ا‏‏ے۔
گرین لینڈ 1721 وچ ڈینش حکومت دے ماتحت آیا، جدوں ڈنمارک اور ناروے (جہڑا 1814 تک اک ای بادشاہ دے ماتحت سی) نے گرین لینڈ وچ اک مذہبی مشنری مہم کلائی۔ اس مہم نے انیوئٹ لوکاں نوں عیسائی مذہب وچ بدل دتا۔ بعد و چ ڈنمارک-ناروے نے ساحلی علاقیاں وچ تجارتی نویاں آبادیاں قائم کیتیاں تے ایتھے تجارتی اجارہ داری تے دوجیاں نویاں سہولتاں نافذ کیتیاں، اودوں توں گرین لینڈ ڈنمارک دے ماتحت اے۔
گرین لینڈ وچ اک تفویضی پارلیمانی حکومت قائم اے۔ ایدا بادشاہ ڈنمارک دا بادشاہ ہوندا اے، جد کہ وزیر اعظم حقیقی طور تے حکومت دا سربراہ ہوندا اے۔